LAJMI FUNDIT/ Krim i rëndë! Edmond S. ekzekutohet pranë banesës së tij

Një ngjarje e rëndë kriminale ka tronditur pas mesnate zonën e Bërxullës, në Vorë, ku një 50-vjeçar është vrarë me armë zjarri në një atentat.

Viktima është identifikuar si Edmond (Ali) Sula, i cili, sipas informacioneve paraprake, është qëlluar me armë zjarri teksa po lëvizte në këmbë pranë banesës së tij.

Ngjarja ka ndodhur rreth orës 00:10, ndërsa sipas të dhënave të para, autori ose autorët kanë hapur zjarr ndaj 50-vjeçarit dhe janë larguar menjëherë nga vendi i ngjarjes.

Advertisement

Si pasojë e plagëve të marra, Edmond (Ali) Sula humbi jetën, ndërsa autorët arritën të largohen para mbërritjes së policisë.

Në njoftimin paraprak, Policia e Shtetit bëri të ditur:

“Më datë 12.07.2026, rreth orës 00:10, në fshatin Bërxullë, Vorë, dyshohet se është vrarë me armë zjarri shtetasi E. (A.) S., rreth 50 vjeç, i cili ka qenë në rrugë, duke lëvizur në këmbë.”

Menjëherë pas marrjes së njoftimit, në vendngjarje kanë mbërritur forca të shumta policore, ekspertë të kriminalistikës dhe një grup i posaçëm hetimor, i cili, nën drejtimin e Prokurorisë, ka nisur ekzaminimin e zonës dhe grumbullimin e provave materiale.

Hetuesit po punojnë për të dokumentuar plotësisht dinamikën e ngjarjes, për të identifikuar autorin ose autorët dhe për të zbardhur motivin e këtij ekzekutimi.

Ndërkohë, Policia e Shtetit ka ngritur pika kontrolli në hyrje dhe dalje të zonës, ndërsa janë intensifikuar kontrollet për lokalizimin dhe arrestimin e personave të dyshuar.

Deri në këtë fazë të hetimeve, autoritetet nuk kanë dhënë detaje mbi motivin e mundshëm të vrasjes dhe nuk kanë bërë të ditur nëse viktima ka pasur konflikte të mëparshme apo nëse ngjarja lidhet me ndonjë aktivitet kriminal.

Grupi hetimor po vijon punën për analizimin e provave, marrjen në pyetje të dëshmitarëve dhe sigurimin e çdo informacioni që mund të ndihmojë në zbardhjen e plotë të kësaj ngjarjeje të rëndë.

Personat që mund të përfshihen në këtë çështje prezumohen të pafajshëm derisa fajësia e tyre të provohet me vendim të formës së prerë nga gjykata