(VIDEO) Avioni u rrëzua mbi një shtëpi në Gjermani

Dy persona kanë humbur jetën pasi një avion i vogël u rrëzua sot, pak para orës 11:00, mbi një shtëpi familjare në landin **Saksonia e Ulët**, në pjesën veriore të Gjermanisë.

Aksidenti ka ndodhur në zonën **Ganderkesee**, pranë qytetit **Bremen**. Ekipet e shpëtimit fillimisht kanë gjetur trupin e një personi, ndërsa pas disa orësh kërkime kanë arritur të gjejnë edhe trupin e personit të dytë që ndodhej në avion.

Sipas informacioneve të para, avioni ishte nisur nga **Bremeni**, por pak pas ngritjes në ajër ka filluar të humbasë lartësi dhe është rrëzuar në një zonë të banuar.

Shkaqet e aksidentit ende nuk dihen dhe janë nën hetim nga autoritetet gjermane. Policia nuk ka bërë ende publike identitetin e viktimave, ndërsa ka njoftuar se më shumë detaje priten të publikohen gjatë mbrëmjes.

Në momentin e përplasjes, pronarët e shtëpisë nuk ndodheshin brenda banesës, ndaj fatmirësisht nuk ka pasur persona të lënduar në mesin e banorëve.