Ngjarje si në një film kriminal: Gruaja dyshohet se organizoi vr.asjen e bashkëshortit me një gjarpër helmues për ta paraqitur si aksident

**Ngjarje si në një film kriminal: Gruaja dyshohet se organizoi vrasjen e bashkëshortit me një gjarpër helmues për ta paraqitur si aksident**

Një rast që ngjan me një skenar filmi kriminal ka tronditur Indinë, pasi policia pretendon se një grua 32-vjeçare ka organizuar vrasjen e bashkëshortit të saj duke përdorur një gjarpër shumë helmues, me qëllim që vdekja të dukej si një aksident tragjik.

Viktima është identifikuar si **Atul Kumar Panwar, 32 vjeç**, pronar i një qendre private për kujdes ditor në distriktin Meerut, në shtetin Uttar Pradesh. Ai u gjet i vdekur të premten në mëngjes në shtëpinë me qira ku jetonte me bashkëshorten dhe djalin e tyre 6-vjeçar.

Sipas hetimeve të policisë, bashkëshortja e tij, Damini, dyshohet se kishte planifikuar vrasjen në bashkëpunim me shoferin e autobusit të shkollës, Tushar, me të cilin autoritetet dyshojnë se kishte një lidhje jashtëmartesore.

Hetuesit besojnë se fillimisht viktimës i është dhënë qumësht i përzier me ilaçe gjumi. Pasi ai kishte rënë në gjumë, dyshohet se është përdorur një **krait**, një nga gjarpërinjtë më helmues në Azi, për ta kafshuar gjatë kohës që ai flinte.

Sipas dyshimeve të policisë, qëllimi ishte që vdekja të dukej si pasojë e një kafshimi aksidental nga gjarpri.

### Gjarpri u gjet në shtrat

Të nesërmen në mëngjes, gruaja u kishte thënë fqinjëve se bashkëshorti i saj kishte vdekur nga kafshimi i një gjarpri. Gjarpri u gjet vërtet në shtrat dhe u vra nga personat që ndodheshin aty.

Fillimisht, prania e gjarprit dhe shenjat e kafshimit në dorë dhe këmbë bënë që policia të dyshonte për një aksident. Megjithatë, gjatë hetimeve u shfaqën dyshime të reja.

### Dyshimet e familjes çuan në zbulimin e rastit

Babai i viktimës ngriti dyshime dhe denoncoi te autoritetet se nusja e tij mund të ishte e përfshirë në vdekjen e djalit të tij.

Gjatë hetimit, policia zbuloi se shoferi i autobusit të shkollës kishte filluar të punonte në kompani vetëm tre muaj më parë dhe dyshohej se kishte një lidhje me gruan e viktimës.

Hetimet çuan në arrestimin e **katër personave**: bashkëshortes, të dyshuarit për lidhjen me të, si dhe dy personave të tjerë që dyshohet se siguruan dhe përdorën gjarprin helmues për realizimin e planit.

Atul dhe Damini ishin martuar në vitin 2019 dhe jetonin së bashku me djalin e tyre 6-vjeçar. Vetëm tre muaj para ngjarjes, ata kishin hapur edhe një shkollë për fëmijë, ku punonte edhe Tushar si shofer autobusi.

Sipas policisë së distriktit, provat e mbledhura deri tani tregojnë se vdekja e 32-vjeçarit nuk ka qenë aksidentale, por një vrasje e planifikuar që ishte menduar të dukej si një vdekje natyrale nga kafshimi i gjarprit.